डोल्पा। हिमाली जिल्ला डोल्पाबाट निर्वाचित प्रतिनिधि सभा सदस्य एबम पूर्व मन्त्री  धनबहादुर बुढाले जिल्लाका साझा मुद्दा र विकासका प्राथमिकता तय गर्न सर्वदलीय तथा सर्वपक्षीय छलफल आह्वान गरेका छन् ।

सांसद बुढाले जिल्लाका पूर्व जिल्ला विकास समिति सभापति तथा उपसभापतिहरु, पूर्व तथा वर्तमान जिल्ला समन्वय समिति प्रमुख र उपप्रमुखहरु, साथै जिल्लाका आठवटै स्थानीय तहका प्रमुख तथा उपप्रमुखहरुलाई काठमाण्डौमा हुने छलफलमा सहभागी हुन आग्रह गरेका हुन्।

उनले जिल्लास्थित पार्टीका केन्द्रीय कमिटीका पदाधिकारीहरु, प्रदेश कमिटीका पदाधिकारीहरु, पूर्व मन्त्री तथा माननीयहरु, जिल्ला अध्यक्ष तथा सभापतिहरु, जिल्ला स्थित नागरिक समाज, पत्रकारहरु लगायत सम्पूर्ण सरोकारवाला निकायलाई समेत सहभागी हुन आग्रह गरेका छन् ।

सांसद बुढाले डोल्पाको समग्र विकासका लागि साझा धारणा निर्माण गर्ने, जिल्लाका प्रमुख आवश्यकता पहिचान गर्ने र नेपाल सरकारसमक्ष संयुक्त रुपमा माग प्रस्तुत गर्ने उद्देश्यले छलफलको कार्यक्रम तय गरिएको बताए।

बुढाले छलफलमा सहभागी सबै पक्षको सुझाव, सहकार्य र उपस्थितिले डोल्पाको साझा विकास अभियानलाई थप प्रभावकारी बनाउन महत्वपूर्ण हुने विश्वास समेत व्यक्त गरेका छन् ।

कार्यक्रम यही वैशाख ७ गते सोमबार दिउँसो १ बजे काठमाण्डौंको कोटेश्वरस्थित डीज बुटिक होटलमा हुने जनाइएको छ।